|
Frammøte var sett til klokka sju på ferja. Det var ein flott
sommarmorgon, difor gjorde det ikkje noko at ein måtte stå opp noko tidlegare
enn det ein vanlegvis gjer i ferien. På ferja vart mobiltelefonen grundig
kontrollert for å sikre oss at eksperimentet ikkje skulle mislukkast grunna
teknisk slurv.
Fire spente personar hadde eit viktig oppdrag denne dagen.
Dei skulle undersøkje om ein verkleg kunne lese nyhende frå Barmen i
høgfjellet. For å kvalitetssikre eksperimentet valde delegasjonen frå øya å reise
til eit høgast mogleg fjell i regionen. Fjellet Skåla (1848 m.o.h.) i Stryn kommune
vart samrøystes plukka ut som forsøksområde.
Klokka 09.30 steig følgjet ut av bilane i Loen, og starta på
fotturen opp mot Skåla. Vêret spelte på lag med forskarane, og turen gjekk lett
oppover fjellsida. Med eit rikt inntak av sjokolade, friskt vatn og pausar med
ei fantastisk utsikt, vart turen oppover ei flott oppleving. Det vart notert i
loggen at om ein tek turen i eit roleg tempo, vil mange greie å kome seg opp til
Skålatårnet. Under oppstiginga til toppen vart det observert turkollegaer frå
om lag sju til godt over 70 år.
Det var ei høgtidleg stemning då følgjet nådde toppen. Alle
venta spent då mobilen vart sett på søk etter barmen.no. Då logoen til
barmen.no tikka inn på skjermen, vart det utveksla gratulasjonar blant reisefølgjet.
Det gledelege resultatet vart feira med kaffi og kvikk lunsj.
På veg ned til bilane fekk ein høyre at over 80 bilar hadde
parkert nedanfor fjellet denne dagen. Det
tydde på at fleire hundre personar var på Skåla denne dagen.
Etter ein fantastisk tur var det godt å kome heim att til
Barmen med ferja klokka 21.35. Og ikkje minst var det kjekt å kunne spreie den
gledelege bodskapen: Vi veit frå før at barmen.no fungerer i utlandet, og no
har vi òg funne ut at ein kan lese nytt på barmen.no i høgfjellet.
Har du gjort fleire observasjonar over kvar barmen.no
fungerer. Send gjerne ein liten tekst og bilde til: fagerli@barmen.no
| 
