Fjordenes Tidende skriv 16.02.2004:

Seljepolitikarane ønskjer spleiselag til ny ferje til Barmen. Ap og Sp sine fylkespolitikarar er sentrale for at det skal lukkast.

Onsdag vart formannskapet orientert om at reiarlaget som driv ferja til Barmen har planar om skifte ut BF ”Barmen” med ei ny ferje. Eit forslag, i 10 punkt, mellom reiarlaget og kommunen er utarbeidt.

Ordførar Helgesen (KrF) gav formannskapet beskjed om at å skifte ut ferje, eller motor i dagens ferje, ville auke behovet for årleg driftstilskot med 150.000 kroner.

Helgesen gav beskjed om at ho alt har vore i kontakt med fylkesordførar Nils R. Sandal (Sp) med beskjed om at det ville komme søknad om at fylkeskommunen aukar sine årlege overføringar med 75.000 kroner.

- Dersom ikkje fylkeskommunen er med må vi vurdere å ta heile kostnadsauken sjølv. Ferja til Barmen er viktig for dei som bur der, meinte ordførar Helgesen som understreka at Barmen var eit samfunn med så mykje positiv aktivitet at fylkeskommunen brukte øya som førebilete for andre.

Varaordførar Liv Stave (H) meinte at når fylkeskommunen brukte aktiviteten på Barmen som eit eksempel til etterfølgelse, så burde dei sjølvsagt også vere med på å dele den auka kostnaden.

- Det er likevel slik at det ikkje flyt med pengar i samferdskomiteen, så det er viktig å vere tidleg ute, sa Stave.

- Alle veit at det er Arbeidarpartiet og Senterpartiet som sit med makta i fylket og det er difor viktig at lokale representantar frå desse partia snakkar med eigne fylkespolitikarar, var beskjeden frå Åge Starheim (Frp).

Ingen av dei sju medlemmane i formannskapet hadde noko imot ar det vert kjøpt ny ferje, eller ein ny motor i den gamle ferja, til sambandet Barmen- Barmsund. Jobben framover blir derfor å få til eit spleiselag, slik at kommunen slepp å ta den auka kostnaden åleine.

Tilbake til hovudsida

barmen.no 17.02.2004